MANILA – Wala pa’y gipalugwa nga reaksyon ang tagsa-tagsa ka love partners sa kanhi maghigugmaay nga sila actor Joshua Garcia ug Julia Barretto.
Kini human pulos gidawat sa duruha ang subli pagtandem sa pelikula nga nag-uluha’g UN/HAPPY FOR YOU nga ilugwa sa mga senehan sa Abril ning tuiga.
Naghatag sa kalipay ug kahinam sa fans sa duruha ilabina sa JoshLia loyalists ang wala pagduha-duha nila pag-uban sa usa ka proyekto bisan sa ilang sakit nga panagbulag sa miaging katuigan.
Si Julia ang kasamtangang hinigugma ni actor Gerald Anderson samtang si Joshua boyfriend usab ni French-Filipino athlete Emilienne Vigier.
Namahayag si Julia nga tawag sa trabaho ug walay laing motibo ang pagdawat niya sa offer ikauban sa maong pelikula si Joshua.
Dumduman nga kontrobersyal si Julia kay giakusahan nga giilog si Gerald gikan sa mga kamot ni actress Bea Alonzo kaniadto.
Samtang namahayag si Joshua nga wala pa kini personal nakapahibalo kang Emelienne nga magtandem balik sila ni Julia sa pelikula.
Apan kini namugos nga daw supportive ang iyang hinigugma sa trabaho niini isip actor.
