CAGAYAN DE ORO CITY- Gikasuhan sa illegal possession of firearms ug kasupakan sa omnibus election code ang inahan ug igsoong lalaki ni Claveria Mayor Miraluna Salvaleon Abrogar sa prosecutor’s office ning syudad.
Kini human unang nakuhaa’g duha ka kalibre 45 nga armas ang civilian security escorts ni Gertrudes,67 ug Reagan Salvaleon nga sila si Mario ug Christopher Pagara dihang gi-ronda sa CIDG-Misamis Oriental Team,Special Action Force ug Claveria Police Station ang mga pinuy-anan sa mga suspek.
Miingon si CIDG MisOr team operative Police Executive Master Sgt Noel Oclarit nga tinood nga wala nila makuha ang ubang mga armas sa mga Salvaleon apan may partisipasyon gihapon ang mag-inahan kon nganong gitugtan nila ang magsoong Pagara nga maghupot sa duha ka caliber 45 pistol nga walay mga dokumento.
Samtang masaligon si Abrogar nga mabasura ang kasong illegal possession of firearms ug Omnibus Election code nga gipasaka sa Criminal Investigation and Detection Group o CIDG-10 batok sa iyang inahan ug igsoon sa korte.
Gibutyag ni Abrogar nga hayan makagawas na ang mag-inahan ug magsoong Pagara kay gitugtan sila sa korte nga makapiyansa batok sa maong mgak kaso.
Gani, gipamugos ni Abrogar nga huyang ang kaso nga gipasaka batok sa iyang inahan ug igsoon kay walay nakuha nga mga armas sulod sa ilang panimalay.
Una niini,nadakpan sa CIDG-MisOr team ang mag-inahan kauban ang unom ka miembro sa CAFGU Active Auxiliary dihang gisilbi ang search warrant operations sa Brgy Malagana,Claveria,Misamis Oriental sa miaging adlaw.
Samtang giangkon sa 4th Infantry Diamond Division,Philippine Army nga nangayo’g tabang sa kapolisan ug militar ang pamilyang Salvaleon sulod sa ilang compound.
Miingon si 4th ID spokesperson Capt Reggie Go nga ilang gibutangan sa unom Cafgu members ang maong lugar tungod sa reklamo sa pamilya nga gihulga sila sa usa ka Jaime Cawasan nga pamatayon.
Apan depensa ni Go nga lisensyado ang mga armas nga nakuha sa posisyon sa CAFGU ug nakasul-ob pa sila sa ilang mga uniporme dihang gilusob sa CIDG ug SAF sa PNP ang mag-inahang Gertrudes ug Reagan Salvaleon nga target sa search warrant sa korte.
Dugtong niini,gisalig na lamang sa Police Regional Office o PRO-10 sa korte ang paghukom kon sad-an sa kasong illegal possession of firearms ug Omnibus Election code ang pamilyang Salvaleon.
Sulti ni PRO-10 spokesperson Police Lt Col Surki Serenias nga dili magpaggawas sa search warrant ang korte kon walay bug-at nga basehan nga nagbaton sa illegal nga armas ang mga suspek nga sila si Getrudes ug Reagan.
Dugang ni Serenias nga nakasubay usab sa balaod ang CIDG-Mis Or team sa pagsilbi sa search warrant.
Gani, gipanganti niini nga andam nilang atubangon ang bisan unsang reklamo sa gipahigayon nga operasyon.
