CAGAYAN DE ORO CITY-Giangkon sa suspetsadong 22 anyos nga si Richard Pasamonte nga iyang gidunggab-patay ang mag-inahan sa Zone 7,Malasag,Brgy Cugman ning syudad.
Si Pasamonte miingon nga iyang nahimo ang krimen tungod sa sobrang kahubog. Dugtong niini, nangayo siya’g pasaylo sa pamilya sa mga biktima sa krimen nga iyang nahimo.
Gidunggab-patay ni Pasamonte ang mag-inahan nga sila si Rufina Labininay, 44 anyos ug anak nga si Niel Stephen Labininay, 4 anyos.
Gani,wala magdahom ang bana sa namatay’ng si Rufina nga mabuhat ni Pasamonte ang krimen.
Matud ni Nelson Labininay nga usa ka but-an ug tarong nga tawo ang iyang pag-ila sa suspek hinungdan nga wala siya magtoo nga mahimo niini ang brutal nga pagpatay sa iyang mag-inahan.
Blangko pa si Labininay sa motibo sa suspek taliwala nga nawala ang bag nga gisudlan og kwarta sa iyang asawa.
Kainom pa ni Labininay ang suspek sa wala pa mahitabo ang krimen.
Samtang giila ni Cugman Police Station commander C/Insp Evan Viñas nga usa sa mga suspek sa pagpatay sa mag-inahan si Labininay.
Matud ni Viñas nga nahibulong siya sa pagka-kalmado ni Labininay sa kamatayon sa iyang mag-inahan.
Wala niya makita nga naguol o nataranta kini bisan nawad-an kini’g duha ka minahal sa kinabuhi. Tungod niini, nagduda si Viñas nga may lain pang motibo ug suspek sa kamatayon sa mag-inahan.
