CAGAYAN DE ORO CITY – Kasuha’g extortion o pagpangilkil sa usa ka konsehal ang sakop sa media nga nasignit sa joint operation sa mga operatiba sa provincial ug regional operatives sa National Bureau of Investigation o NBI sa piskalya sa Bukidnon sunod semana.
Kini gipa-entrap ni Valencia City Councilor Jun De Asis ang suspek nga si Liezel Banga nga nagsilbing ‘paid media blocktimer’ sa usa ka FM station sa maong syudad aron giingong tirahon sa nagkadaiyang isyu epekto sa May 12 elections.
Gibutyag ni De Asis nga nakurat kini sa atake ni Banga rason nga nangita’g paagi nga iyang direktang makontak aron mangayo’g katin-awan.
Sulti niini sa atubangan sa media nga nangayo’g pasaylo ang maong magsisibya kaniya ug mipasabot nga trabaho lang kini ug gisugo siya aron tirahon ang iyang pagkatawo.
Namahayag pa si De Asis nga mibungat daw ang dinakpan sa 500-mil pesos nga bayad bugti sa dili na pag-atake kaniya ug daygon na lang kini sa mga mosunod nga mga adlaw.
Mihangyo daw niini si De Asis sa 300-mil pesos apan gitubangan usab kini nga 350-mil pesos ang pinal nga deal niini.
Giingong nagkauyon daw sila apan ang wala masayri sa suspek nga miduol na siya sa NBI aron magpatabang kung unsaon ang pagkasa sa entrapment operation.
Kini ang rason nga nadakpan ang suspek ug gidala sa kustodiya sa NBI samtang gihikay ang pagdason sa kaso sa piskalya sunod semana.
Nagdumili na pagtug-an si De Asis kung kinsa ang posibleng nagsugo kang Banga kay dili usab kini gusto masayop sa iyang pagduda.
Sa pagkutlo ning balita,wala pa’y gilugwang reaksyon ang dinakpan apan gigahinan kini’g espasyo sa Bombo Radyo Philippines aron madungog usab ang panig niini kabahin sa isyu.
