CAGAYAN DE ORO CITY-Miligid na ang kapin gatos ka adlaw human ang pagpatay kang USTP Pres Dr Ricardo Rotoras apan wala pa gihapo’y lig-on nga resulta ang gimugna nga SITG-Rotoras.
Kini ang gibutyag ni Rene Rotoras, ang kamagulangang igsoon sa pamilya Rotoras atol sa pakighinabi sa Bombo Radyo.
Gibutyag ni Rene nga taas na nga panahon ang ilang gihulat apan nagpabiling haw-ang ug walay tubag sa ilang mga pangutana kalabot na sa utok sa nagpatay sa ilang igsoon.
Nagpaabot ang pamilyang Rotoras sa opisyal nga statement gikan sa mga piniling imbestigador tungod kay dili usab mawala sa ilang pangutukan nga posibleng mahulga ang ilang tagsa-tagsa ka kinabuhi.
Samtang gisaway ni Eldie Rotoras, ang labing sood nga igsoon sa biktima ang pagbutyag sa SITG-Rotoras nga “considered case close” na ilang imbestigasyon.
Gikuwestiyon ni Eldie ang proseso sa imbestigasyon sa gitukod nga task group ilabina nga wala pa gani resulta sa CCTV camera nga ilang gipahiling sa PNP anti cyber crime group.
Gawas niini, nakakuha usab ug report si Eldie nga gipadala na sa Kampo Crame sa kauluhan kay dili maklaro sa anti cyber crime group ang mga imahen nga mipatim-aw sa recorded video footage.
Samtang posibleng mapasaka na ang kaso batok sa utok sa pagpatay kang Rotoras.
Apan nagdumili ang SITG Rotoras sa pagbutyag kung kinsa ang master mind sa krimen.
Miingon ni SITG spokesperson Supt Mardi Hortillosa sa Bombo Radyo nga migamit sa teknical ug uban pang aspeto sa imbestigasyon ang nga na-assign nga mga imbestigador sa maong kaso.
Sa pagkakaron,padayong gipalig-on sa maong task group ang ubay-ubay ka mga ebidensya nga ilang makuha batok sa gitudlong mastermind sa pagpatay kang Rotoras.
Gisaad ni Hortillosa nga sa dili madugay makab-ot na ang hustisya sa pamilyang Rotoras.
