CAGAYAN DE ORO CITY – Nadakpan sa hiniusang operasyon sa militar ug kapolisan ang magsoong gitoohang sakop sa rebeldeng New People’s Army o NPA sa lungsod sa Talisayan,Misamis Oriental.
Giila ni 58th IB,Philippine Army commander Lt Col Ricky Canatoy ang mga dinakpan nga si Russel,31 anyos ug Richard Cago,22 anyos,pulos mga ulitawo ug nagpuyo sa Purok 5,Barangay Sindangan,Talisayan.
Gibutyag ni Canatoy nga nakompiskar gikan kanila ang granada,kagamitan paghimo’g bomba ug klase-klase nga medisina nga kuhaon na unta sa 20 ka rebelde aron dad-on sa bukid.
Apan napugos pag-withdraw ang 20 ka rebelde ug nabiyaan ang magsoong Cago dihang nasiplatan ang presensiya sa militar ug kapolisan sa maong lugar.
Samtang kasuhan sa kasupakan sa balaod sa illegal possession of explosives ang magsoong gitumbok sa AFP ug PNP nga suporters sa rebeldeng New People’s Army o NPA sa Purok 5,Barangay Sindangan,Talisayan,Misamis Oriental.
Miingon si Misamis Oriental Provincial Police Office spokesperson Lt Theofratus Pia nga tungod kini sa nakompiskar nga granada,kagamitan paghimo’g bomba ug klase-klaseng medisina nga alang sa mga rebelde.
Gibutyag ni Pia nga nadakpan ang magsoong Cago,22 anyos kay sa ilang posisyon nakuha ang maong kabtangan.
