CAGAYAN DE ORO CITY – Igo ra mipatulo sa luha ang usa ka ginang human mapatay ang iyang kapuyo sa gilusad nga Simultaneous Aggressive Police Operation kon SAPO sa Purok-7, Brgy. Sitio Camansilis, Lanipao, Lala, Lanao del Norte, kagabie.
Giila ni Police Major Jonan Bañas, hepe sa Lala Municipal Police Station ang napatay nga suspek nga si Abdul Hamid Muslim, DI watchlist ug under probation sa kasong pagpayuhot sa druga (RA 9165) sa Sultan Naga Demaporo.
Segun ni Major Bañas, unang namusil ang suspek samtang nagpaduol ang arresting team kaniya.
Nakuha sa posisyon sa suspek ang 45 kalibre nga armas, mga buhing bala, ug lima ka sachet sa shabu nga nagbalor sa P5,000.
Una niini, lakip nga milanding sa ospital ang duha ka operatiba sa Lala MPS human ma-injury sa tiil atol sa engkwentro.
Paslak na sa prisohan ang kapuyo sa suspek nga Grace Buale, under probation sa kasong RA 9165.
