Patay nang nakit-an ang magtiayon nga nanimuyo sa Sitio Migtugsok, Malasag, Brgy Cugman ning syudad kaganihang buntag.
Giila ang mga biktima nga sila si Salvador ug Lucia Sunot nga pulos hingkod ang panuigon diin nanimuyo sa maong lugar.
Nasuta sa kapolisan nga unang nakaangkon sa samad dinunggaban sa dughan sa sundang si Lucia ug nagbuy-od sulod sa ilang kaugalingong payag.
Nadiskobre usab nila nga naghikot sa pisi sa li-og si Salvador diin nagbitay ibabaw sa punuan sa kahoy sa nasangpit nga lugar.
Nagtoo ang mga otoridad nga mismo si Salvador ang mipatay sa iyang kapikas ayha naghikog, hinungdan nga pulos sila wala na’y kinabuhi dihang nadiskobre sa ilang anak nga nagtigway sa binuhing baka.
Hisayrang dugay nang kanunay mag-away ang magtiayon ug nahitabo pa nga miipon sa laing babaye si Salvador ayha mibalik sa ilang pinuy-anan sa maong lugar.
