CAGAYAN DE ORO CITY – Kasuhan sa Philippine Drug Enforcement Agency o PDEA 10 sa pisklya ang pito ka suspected drug pushers ug users nga ilang nadakpan kuyog ang mga operatiba sa Cogon Police Station ug Regional Intelligence Unit sa Police Regional Office 10 sa Zone 2,Brgy 36 ning syudad kagahapon.
Kini human gilusad ang buy bust operation batok sa magtiayong Noraima Abdul alyas ‘Madame’ ug Alimoden Mutalid Imam diin nakuhaan sila sa 15 gramos nga gitoohang shabu nga nagbalor 22-mil pesos.
Nadakpan usab sulod sa ‘drug den’ nga gidumala sa magtiayon ang ilang mga parokyano nga gilakipan Jonaifa Elias;Jalani Abdullah;Janice Macalia;Jamal Alawina ug Jessica Macalia nga pulos molopyo sa lugar.
Namahayag si PDEA -MisOr Team leader Agent Ben Calibre nga pagsupak sa lima ka sections sa Comprehensive Dangerous Drugs Act of 2002 ang atubangon sa mga dinakpan sa piskalya karong adlawa.
Giimbestigaran na sa PDEA ang mga gipangsulti sa magtiayon kon kinsa ang tig-suplay ug naghatag proteksyon sa ilang mga ilegal nga kalihukan.
