CAGAYAN DE ORO CITY – Napatay sa Joint Task Force Diamond nga nilangkuban sa 8th IB,Philippine Army ug sa intelligence units ang anak-lalaki sa unang na-neutralized nga si CPP-NPA national operations command commander Jorge Madlos alyas Ka Oris nga si Vincent Isagani kuyog ang mismong kapikas niini nga si Angie Polandres Salinas sa Brgy Kapitan Bayong,Impasug-ong,Bukidnon.
Miingon si 4th ID commander Maj Gen Welbur Mamuwag nga mihimo sa special operations ang tropa ni 403rd IB officer-in-charge Col Ted Dumosmog hinungdang natigayon ang 15 minutos nga sinukliay sa mga bala nga nag-resulta sa kamatayon sa anak ni Ka Oris ug Salinas.
Narekober gikan sa napatay’ng magtiayon ang duha ka AK-47 rifles ingon man kagamitan sa panggubatan.
Hinoon,wala mabutyag kon sa maong engkuwentro dunay sakop sa mga sundalo ang namatay o samaron.
Niadtong Oktubre 30,2021,napatay sa 1st Special Forces Batallion kuyog ang ubang sakop sa task force si Ka Oris kuyog ang iyang medical aide sa dugu-ong engkuwentro sa Bukidnon.
Gihimakak sa NPA-North Central Mindanao Region ang alegasyon sa militar nga namatay sa engkwentro ang anak ug kapikas ni ‘Ka Oris’.
Sa pakighinabi sa Bombo Radyo, gibutyag ni Ka Malim Mabini nga dakong bakak ang pahayag sa 403rd Infantry Brigade, Philippine Army nga na-engkwentro sa mga tropa sa 8th IB sila si Vincent Isagani Madlos ug Angie Polandres Salinas nga miresulta sa ilang kamatayon.
Miingon si Mabini nga basi sa report sa ilang ‘unit’ sa Impasug-ong, gidakop sa militar sila si Madlos ug Salinas niadtong adlaw’ng Sabado.
Nagtoo si Mabini nga gipatoo lamang sa militar nga namatay sa engkwentro ang ilang duha ka mga kauban.
Dugang pa ni Mabini nga niadtong Oktubre 30, 2021 gipatoo usab sa militar nga ilang napatay sa ingkwentro si Ka Oris sa Brgy. Dumalaguin sa mao gihapon nga lungsod.
Apan tubag sa 4th ID,nga mismo ang magtiayong Madlos ug Salinas ang napatay sa ilang tropa sa Brgy Kapitan Bayong,Impasug-ong,Bukidnon.
Miingon si 4th ID,Philippine Army spokesprson Maj Franciso Garello Jr nga sukwahi sa gilayong pagpamakak sa nagpaila nga tigpamaba sa grupo nga si Ka Malim kabahin sa hitabo.
Miingon si Garello nga mismo ang intelligence community ug kanhi mga kauban sa duruhs ang nagkompirmar kabahin sa ilang pagkatawo.
Si Vincent ang usa sa mga anak-lalaki sa unang napatay nga si Ka Oris sa mao gihapon nga probinsya sa miaging Oktubre 2021.
