(Update) CAGAYAN DE ORO CITY – Wala isalikway sa kapolisan ang anggulo nga gitulis-patay ang magtiayong negosyante samtang sila sakay sa wing van sa interior nga bahin sa Purok 1,Sitio Estero,Brgy Dologon,Maramag,Bukidnon.
Giila ni Bukidnon Provincial Police Office spokesperson Maj Jiselle Longgakit ang mga biktima nga sila Daniel ug Adelaida Adolfo Ocot nga pulos hingkod ang edad nga nagpuyo sa Barangay Manalog,Inonangan,Southern Leyte,Eastern Visayas.
Miingon si Longgakit nga natumbok ang pangalan sa mga biktima pinaagi sa tawag sa nabiling celphone sa magtiayon diin ang usa sa ilang mga anak ang nakatubag sa pagtawag sa mga pulis kagahapong adlawa.
Gibutyag sa opisyal nga gipalawman pa nila ang imbestigasyon kon tinud-anay ang motibo sa pagpanulis sa wala ilhing mga suspek sanglit wala pa’y lig-ong basehan kon may salapi o mahalong kabtangan ang nangawala.
Wala usab isalikway sa PNP nga posibilidad nga inside job ang kremin kay dul-it ang pagkapusil sa mga suspek ngadto sa mga biktima samtang anaa suod sa sakyanan.
Nasuta nga tigkumparahan sa mga produktong saging ug mga utanon ang mga biktima dinhi sa Northern Mindanao partikular dinhi sa syudad ayha dad-on pabalik sa ilang lugar.
Natumbok usab nga posibleng kabanay ra sa mga biktima ang tag-iya sa sakyanan nga ilang gimaneho kay susama nila kini’g apelyido apan nagpuyo sa dakbayan sa Sugbo.
Sa pagkakaron,tahas sa Bukidnon PNP ubos sa pagpangulo ni Provincial Director Col.Reynante Reyes nga madali ang pagsulbad sa kremin aron kahatagan sa hustisya ang mga biktima.
