CAGAYAN DE ORO CITY – Gimando ni Bukidnon Provincial Police Office Director Police Col Reynante Reyes kang Don Carlos Police Station commander Patrick Castro nga dalion ang pagsulbad sa pagkatulis-patay sa magtiayong negosyante sa Purok 8,Brgy Calaw-Calaw,lungsod sa Don Carlos.
Gibutyag ni Reyes nga subay sa inisyal nga imbestigasyon sa mga sakop ni Castro nga sakay sa motorsiklo ang mga biktima nga sila Jolito Bizon ug Tessie Bernadez kay dunay paliton sa merkado sa dihang giharang sila sa motorcycle in tandem suspects.
Gilayong gikuha sa mga suspek ang bag ni Bernadez diin didto nakasulod ang wala matino nga kantidad sa salapi.
Gipangpusil gilayon ang mga biktima sa wala matino nga kalibre sa armas ug dili pa igo gidunggab sa makaupat nga higayon sa mga tulisan si Bizon.
Gisulayan pa pagdala sa ospital ang mga biktima apan wala na matabang sa mga doktor kagahapong adlawa.
