CAGAYAN DE ORO CITY- Gibalhog na karon sa bilangguan ang magtiayon nga suspected NPA rebels nga unang nasikop sa operasyon sa militar ug kapolisan sa pantalan sa Ozamiz City,Misamis Occidental.
Giila ang mga dinakpan nga sila si Lito Elmedolan alyas Ka Ondoy ug Maria Bella Elmedolan nga pulos nagpuyo sa lungsod sa Prosperidad,Agusan del Sur.
Gibutyag ni Misamis Occidental Provincial Police Office Director Sr Supt Jaysen de Guzman nga gisikop ang mga suspek pinasikad sa warrant of arrest sa kasong multiple frustrated murder nga gipagawas ni RTC Branch 6 Presiding Judge Kimal Salacop nga nakabase didto sa Agusan del Sur.
Gitumbok sa korte nga ang magtiayong Elmedolan ang kabahin sa mihimo’g pagpang-ambush sa Danawan,Agusan del Sur.
Nasuta usab nga miembro ang magtiayong Elmedolan sa technical ordnance ug finance committees sa kalihukang NPA dinhi sa Mindanao.
