CAGAYAN DE ORO CITY – Patay ang magtiayong senior citizens nunot sa pagkasunog sa ilang pinuy-anan sa Purok 15,CMU-Musuan,Brgy Dologon,Maramag,Bukidnon.
Giila ni Maramag Police Station commander Lt Col Julius Clark Macariola ang mga biktima nga sila si Fedencio,89 ug Condrada Joromat,83 anyos nga pulos nagpuyo sa maong lugar.
Gibutyag ni Macariola nga subay sa ilang imbestigasyon nga unang gisugo sa mga biktima ang ilang apo pagpalit sa kandila aron gamiton nga suga kay kalit nawala ang linya sa koryente sa ilang pinuy-anan.
Apan maoy nabantayan sa mga apo nga nagsiga na ang ilang pinuy-anan hinungdan nga giaghat sila sa mga biktima nga mag-una sa paggawas.
Tungod sa kapaspas sa kalayo nga milamoy sa maong pinuy-anan,nalukong ug naapil sa pagkasunog ang mga biktima hinungdan sa kamatayon niini gabii.
