CAGAYAN DE ORO CITY – Kasuhan sa parricide ug illegal disposal of dead person ang magtiayon nga giingong milubong sa iyang 9 months old nga anak sa ilang tugkaran sa Pasil, Brgy. Kauswagan ning syudad.
Kini kon mapamatud-an sa autopsy report nga adunay foul play sa kamatayon sa biktima nga si Mark Endieres.
Nasuta ni Police Master Sgt. Merlita Reyes sa Carmen Police Station nga gapangulata ang amahan nga si Bonifacio Endieres ug Marilou Quibol nga lumad taga-Bukidnon sa iyang mga anak ilabina sa panahon nga mahubog kini.
Una nang nakalutan ang bukog sa maong bata human gisumbong sa mga residente sa nasampit nga dapit ngadto sa mga otoridad.
Detinado na ang suspek samtang nagpadayon ang gihimong imbestigasyon sa insidente.
