Nag‑petition ang magtutudlo nga si John Barry T. Tayam, LPT, ngadto sa Korte Suprema aron ipahimo nga null and void ang Senate Resolution No. 44 nga giingong naghatag og proteksyon kang Senador Ronald “Bato” dela Rosa.Sa interbyu sa Bombo Radyo, gipasabot ni Tayam nga ang iyang petisyon nagbase sa giingong paglapas sa Konstitusyon kalabot sa paggamit sa legislative immunity.
Matod niya, ang immunity sa mga mambabalaod sa aresto magamit lamang kon ang kaso nga giatubang adunay silot nga unom ka tuig paubos, subay sa Section 11, Article 6 sa 1987 Constitution.
Apan giingon niya nga ang mga kasong may kalabotan sa ICC ug ubang seryosong krimen ubos sa RA 9851 mahimong moabot hangtod reclusion temporal o reclusion perpetua, nga mas taas pa sa limitasyon sa Konstitusyon.
Dugang pa sa petitioner, dili absolute ang immunity sa mga mambabalaod, ilabi na kon adunay seryosong kaso ug aktibong warrant of arrest nga gi‑isyu batok sa usa ka opisyal.
Busa iyang gihangyo sa Korte Suprema ang klaripikasyon sa sakto nga sakop sa legislative immunity aron mapanalipdan ang hustong proseso sa balaod.
