Gitin-aw ni Dir. Gerry Caño, Chairman sa Board of Directors sa Cagayan de Oro Water District (COWD), nga ang mahalong bronse o copper nga materyales maoy gituohang hinungdan sa nagkadaghan nga pagpangawat sa mga water meter sa mga konsumante sa COWD.
Iyang giingon nga dili ordinaryo ang klase sa water meter tungod kay gama kini sa bronse nga adunay taas nga kantidad sa junkshops ug metal buyers.
Matod pa niya, ang presyo sa bronse o copper karon mokabat na og 800 hangtod 900 pesos kada kilo, maong giinteresan kini sa mga kawatan.
Tungod niini, nakig-coordinate na ang COWD sa kapulisan ug mga barangay aron mapalig-on ang pagbantay batok sa maong krimen.
Giingon usab ni Caño nga adunay nadakpan na nga suspek ug gipasakaan og kaso nga anaa karon sa Prosecutor’s Office alang sa kompletong pagproseso sa ebidensya.
Gihangyo sa COWD ang publiko nga magbantay sa ilang mga water meter ug dayon mosumbong sa otoridad kon adunay kadudahang kalihokan sa ilang lugar.
