Gikabalaka sa Makakalikasan Movement nga dili na lamang mahimong problema sa kinaiyahan kondili apil na usab sa panglawas ang nagkagrabeng polusyon sa hangin ug epekto sa climate change.
Matod ni Orlando Ravanera, national chairman sa grupo, misaka na pag‑ayo ang greenhouse gas emission sa kalibotan nga maoy nagpadali sa global warming ug nagdala sa mas grabeng wildfire ug kainit sa lain‑laing nasod.
Giingon ni Ravanera nga kung magpabilin sa atmosphere ang dakong porsyento sa carbon emissions sulod sa mosunod nga mga tuig, mosamot pa ang kainit nga mabati sa kalibotan.
Dugang pa niya, dako usab ang kadaot sa pagkawala sa kalasangan ilabi na sa Northern Mindanao diin daghang ektarya sa kakahuyan ang nangahanaw tungod sa logging ug urbanisasyon.
Matod pa ni Ravanera, ang pagtanom og kahoy ug pagpanalipod sa lasang maoy usa sa labing epektibong paagi aron makunhuran ang carbon dioxide sa hangin.
Busa nanawagan siya sa publiko nga magtinabangay sa pag‑atiman sa kinaiyahan aron mapanalipdan ang umaabot nga henerasyon.
