Nanawagan ang grupong Makakalikasan Movement sa lokal nga kagamhanan sa Cagayan de Oro nga tun‑an ug hatagan og pagtagad ang nagkagrabeng polusyon sa hangin sa syudad.
Matod ni Orlando Ravanera, national chairman sa grupo, gikinahanglan nga adunay tukmang pagtuon ug pagsukod sa kahimtang sa hangin karong panahona aron masayran ang tinuod nga lebel sa polusyon ug mga tinubdan niini.
Giingon ni Ravanera nga kon mapasagdan kini, posibleng mosaka ang kaso sa mga sakit ilabi na sa kabataan, mga tigulang ug mga adunay huyang nga panglawas.
Dugang pa niya nga ang paghandum sa Earth Day dili lamang dapat kutob sa mga pulong kondili kinahanglan sabayan sa konkretong lihok alang sa pagpanalipod sa kinaiyahan.
Gipasiugda usab ni Ravanera nga usa sa dakong hinungdan sa kadaot sa palibot karon mao ang padayon nga pagkawala sa kakahuyan sa nasod.
Busa nanawagan siya sa tanan nga magtinabangay aron mapreserbar ang kanaiyanan ug mapanalipdan ang panglawas sa katawhan.
