CAGAYAN DE ORO CITY-Panguluhan sa komitiba sa panglawas ang “Smoke-Free Task Force” nga gitukod sa lokal nga kagamhanan sa syudad.
Kini sa tumong nga mahimong smoke-free ang dakbayan pinaagi sa gipirmahan nga Executive Order No.26 ni Pres Rodrigo Duterte.
Matud ni Dra Maria Lourdes Gaani, chairman sa maong komitiba nga maoy miembro sa task force ang City Health Office, CoCPO, City Information Office, DILG, SK, ABC Federation President, Oro Chamber of Commerce, DepEd ug KBP.
Sugdan na ang implementasyon niini sa bulan sa Oktubre.
Si Dra Gaani miingon nga magbayad na sa silot ang bisan kinsa nga masapong manigarilyo sa mga pampublikong lugar.
Una nang gibutyag ni Gaani nga sugdan nila sa Agosto 16 hangtud bulan sa Setyembre ang information drive may kalabutan sa Executive Order No.26 kon Nationwide smoking ban order.
Samtang gihangyo ni Gaani ang hotels, restaurants ug mga establisimento nga magbutang sa ‘designated smoking area’ sulod sa ilang patigayon.
Kini ilabina nga ila nang hatagan sa ngipon ang pagpatuman sa Nationwide smoking ban.
Siya miingon nga mag-atubang sa bug-at nga silot ang mga establishimento nga dili magbutang sa ‘designated smoking area’ .
