CAGAYAN DE ORO CITY, Philippines – Gisaway ni kanhi Presidente Rodrigo Duterte ang Malakanyang ug ang iyang kanhi National Security Adviser nga si Eduardo Año kalabot sa seryosong pagtratar sa bahad ni Vice President Sara Duterte nga ipapatay niya si Presidente Ferdinand Marcos, iyang kapikas nga si Liza Araneta ug Martin Romualdez, kun ugaling mulampos ang assassination attempt sa sa kinabuhi sa iyang anak.
Sa press conference nga gilusad sa Davao City, kaganinang kadlawon, gitin-aw sa kanhi presidente nga dili kaya sa iyang anak tumanon ang maong bahad ilabe nga nalitok lamang sa bise presidente ang nasampit nga mga pulong epekto sa iyang kalagot sa mga naglangkob sa kamarabaha nga mikustodiya ug midetenar sa correctional facility sa iyang chief of staff nga walay igong basehan.
Namugos si Duterte nga tukma ang gihimong aksiyon ni Atty. Zuleika Lopez nga babagan una ang investigating committee sa kamarabaha nga manguha’g kopya sa mga dokumento nga gisumiter sa Office of the Vice President tungod kay kamulo, ug may kaugalingong imbestigasyon pa ang Commission on Audit (COA) kalabot sa liquidation sa Confidential Funds sa VP Duterte.
Dugtong niini masaligon si Duterte nga malutsan sa iyang anak nga babaye ang pagbi-ay bi-ay, pag-ipit ug posibleng ikaso kani sa kamarabaha.
