Malacañang, nagpahigayon sa mga programa sa pagpalambo sa kahanas ug pagpalapad sa oportunidad sa trabaho

Gipahibalo sa Malacañang ang nagkadaiyang programa sa administrasyon aron matubag ang pagsaka sa gidaghanon sa mga walay trabaho sa nasud, human misaka ngadto sa 5.4 porsiyento ang unemployment rate niadtong Setyembre 2026, nga katugbang sa 2.86 milyon ka Pilipino.

Atol sa press briefing niadtong Biyernes, Nobiyembre 6, gipatin-aw ni Palace Press Officer Claire Castro nga lakip sa mga lakang sa gobyerno ang pagpalambo sa kahanas sa mga trabahante pinaagi sa digital upskilling ug reskilling, ilabina sa teknolohiya ug artificial intelligence (AI), ingon man ang pagpaangay sa kahanas sa mga nangitag trabaho ngadto sa mga bakanteng posisyon.

Gipasiugda usab niya ang Philippine Semiconductor and Electronics Industry Roadmap, ang Luzon Economic Corridor, ug ang 46 ka naaprubahang Special Economic Zones nga gilaumang makadani og ₱141.2 bilyon nga pamuhunan ug makamugna og kapin sa 189,000 ka trabaho.

Dugang pa niini, gisugyot sa administrasyon ang pagpataas sa tinuig nga limitasyon sa kita nga dili pahamtangan og personal income tax ngadto sa ₱350,000 ug ang paghatag og tax exemption sa mga gagmayng negosyo gikan sa duha ka porsiyentong Minimum Corporate Income Tax (MCIT), samtang nakigkoordinar usab kini sa Kongreso aron mapadali ang pagpasa sa nasudnong badyet ug mapalig-on ang kalihokan sa ekonomiya. (raniel mahunyag)