Gihimakak sa Malakanyang ang direktang koordinasyon sa International Criminal Court (ICC) human mi-angkon si Department of Justice (DOJ) Secretary Jesus Crispin Remulla nga miduol kaniya ang pipila ka miyembro sa ICC prosecutors ug naghangyo nga ipa-ubos sa witness protection program ang mga biktima sa Extra Judicial Killings (EJK) batok sa kasong Crimes Against Humanity nga gi-atubang ni kanhi Presidente Rodrigo Duterte.
Namahayag si Palace Press Office Atty. Claire Castro, nga walay komonikasyon ang palasyo sa ICC, apan, katungod sa DOJ nga muhatag sa tabang- proteksyon sa mga testigo nga nalambigit sa kasong war on drugs ni Duterte.
Mipasabot si Castro nga ang pagtabang sa gobyerno sa mga biktima ug testigo nagtumong sa pagkab-ot sa hustisya, ug dili kini direktang kooperasyon sa ICC.
Sa makadaghan higayon, gilimod ni Castro nga si Presidente Ferdinand Marcos Jr ang nagpadala kang Duterte sa Hague, ug ang mismong arkitekto sa pagtaral kaniya sa ICC.
