CAGAYAN DE ORO CITY-Gipasalig ni C/Insp Evan Vinias, hepe sa Cugman Police Station ang paghatag seguridad sa mga deboto nga motungas sa bukid sa Malasag atol sa Huwebes ug Biyernes Santo.
Namahayag si Vinias nga ilang ipaubos sa hugot nga pagsusi ang mga tawong mokat-kat sa Malasag aron maseguro ang ilang kulawasan batok sa posibleng hadla sa mga dautang elemento.
Hinoon, miingon si Vinias nga gawas sa kapolisan, ubay-ubay usab ka grupo nga naglakip sa mga barangay tanod ug civic groups ang maghiusa sa pagbantay sa bukid sa Malasag aron dili matugaw ang pag-penitinsiya ug pagpamaladong sa mga deboto.
Samtang mi-abag ang militar ngadto sa kapolisan sa pagbantay sa mga publikong lugar sa amihang mindanao ug Caraga Region nga dagsaan sa mga deboto ning panahon sa semana santa.
Matud ni 4th ID spokesperson Capt. Joe Patrick Martinez nga dili sila mokompiyansa sa natad sa seguridad tungod sa hadla sa mga dautang elemento, ilabina sa mga teroristang grupo.
Namahayag si Martinez nga daghang mga sundalo ang ilang gipakatag sa mga bus terminal, shopping malls, airports ug simbahan alang sa maong katuyuan.
Si Martinez miingon nga naglusad usab sila sa halapad nga checkpoints ubos sa ilang hurisdiksiyon isip kabahin sa ilang pag-abag sa ‘Oplan Sumvac 2017’ sa kapolisan.
