Gipanghimakak ni Cagayan de Oro City Jail Female Dormitory Warden Jail Senior Inspector Mary Rose Pacana ang mga alegasyon sa social media nga adunay mga hubog ug abusadong jail guards nga nagpasayaw sa mga babayeng preso.
Sa iyang interbyu sa Bombo Radyo iyang gipasabot nga walay kamatuoran ang maong balita ug kung aduna may nahitabong mga pagsayaw sulod sa pasilidad iya kining gi klaro nga kabahin lamang sa welfare ug development program alang sa physical exercise ug mental wellness sa mga preso.
Gidugang pa ni Pacana nga ginahimo usab ang maong mga aktibidad alang sa pagpangandam sa mga espesyal nga okasyon ug mga programa sa gobyerno.
Gumikan niini, gitinaw sa pamunoan sa maong prisohan nga puro ra malisyosong hungihong ang naggawas nga mga impormasyon ug pabilin nga gitahod sa buhatan ang katungod sa mga preso.
