CAGAYAN DE ORO CITY – Retirado na sa pagsilbing dakong opisyal sa militar si Army Maj Gen Wilbur Mamawag nga ulahing mihupot sa pagsilbing commanding officer sa 4th ID,Philippine Army nga nakabase sa Camp Evangelista,Brgy Patag ning syudad.
Kini human pormal nang misugod sa iyang trabaho si 4th ID commanding officer Army Maj Gen Jose Maria Cuerpo.
Giila ni Philippine Army commanding general Lt Gen Romeo Brawner Jr ang nahimong kontribusyon ni Mamawag ilabina sa pagpadayon sa legasiya nga nahimo sa dibisyon nga nag-operate sa mga rehiyon sa Mindanao region.
Subay sa balaod,mo-retiro ang usa ka opisyal sa sundalo sa edad 56.
Si Mamawag ang lumad nga taga- Cagayan de Oro City samtang si Cuerpo ang gikan usab sa Iligan City.
Dugtong usab niini,ipadayon ni Cuerpo ang mga legasiya nga gibilin sa mga nag-una kaniya nga mga kumander aron pabiling mamintinar ang kahusay ug kalinaw sa Northern Mindanao ug Caraga regions.
Kini human dawata ni Cuerpo ang tahas nga gihatag kaniya ni Pres Bongbong Marcos nga panguluhan ang mga sundalo sa 4th ID sa pakigbatok sa bahad sa seguridad sa rehiyon.
Gihimo ni Cuerpo ang pasalig nunot sa opisyal nga pag-retiro sa katungdanan ni Mamawag nga sinaksihan ni Philippine Army commanding general Lt.Gen Romeo Brawner Jr sa grandstand sa Camp Evangelista ning syudad kagahapon sa buntag.
