CAGAYAN DE ORO CITY – Gipetisyonan sa grupo nga “CdeO Peoples Forum” si City Mayor Oscar Moreno nga ipaubos sa enchanced community quarantine o ECQ ang syudad gumikan sa hadla sa coronavirus disease o COVID-19 pandemic.
Miingon si CdeO Peoples Forum lead covenor Dr Meneleo Navarro nga daghan na ang na-infected sa coronavirus sa syudad apan dili matawag nga positibo kay wala mapaubos sa mass testing.
Dugang niini nga angayan usab nga maalarma si Moreno kay sagad sa mga matakdan sa virus giingong mga asymptomatic.
Tulo ka pahina nga petisyon ang giduso sa buhatan sa mayor alang sa maong katuyuan.
Samtang naglaum si Moreno nga dili pamulitika ang petisyon nga giduso sa CdeO Peoples Forum nga ipaubos sa enhanced community quarantine ang syudad gumikan sa hadla sa Covid-19.
Pabilin nga gibarugan sa alkalde nga dili siya makadeklarar sa lockdown kon ugaling walay mando gikan sa Department of Health ingon man sa Northern Mindanao Medical Center.
Nabalaka si Moreno nga maparalisar ang transportasyon gumikan sa lockdown ug maapektuhan ang ekonomiya sa syudad.
Asoy niini nga ubay-ubay ka mga argumento ang angayang ikonsiderar sa pagdeklarar enhanced community quarantines sa dakbayan.
