CAGAYAN DE ORO CITY – Gusto ipa-resign sa pipila ka pamilyang Maranao ang kadagkuan sa Task Force Bangon Marawi nga nakatutok sa pagpabarog balik sa nahagba nga ekonomiya sa Marawi City.
Kini human ang dul-ag duha ka tuig nang pag-rehab ug reconstruct partikular sa 24 ka brgy nga grabeng apektado sa giyera sa militar batok grupong Maute-ISIS sa tuig 2017.
Gihimo ni Maranao peace activist, Drieza Abato Lininding ang hagit tungod sa laing deadline nga gihatag sa pagtrabaho sa most affected area o MAA gumikan sa wala mamboto nga mga bomba niadtong Marawi siege.
Maoy gusto ipa-resign ni Lininding si Task Force Bangon Marawi chairman Sec Eduardo del Rosario mismo sa dayalogo sa Marawi City kagahapong adlawa.
Samtang nakatulo ang mga luha ni Task Force Bangon Marawi chairman Sec Eduardo del Rosario sa batikos ug wala paghatag bili sa paningkamot sa gobierno makabangon lamang ang nagusbat nga syudad sa Marawi.
Kini human gitawag sa mga kritiko ni Pres Rodrigo Duterte nga ghost town pa gihapon ang maong syudad bisan sa dakong pondo nga nagahin alang niini.
Miingon si Del Rosario nga daghang kinabuhi na ang nawala masanta lamang ang tinguha pag-okupar sa grupong Maute-ISIS sa Marawi City.
