CAGAYAN DE ORO CITY-Gikalipay sa kasundaluan ang manifesto sa 41 ka mayores ug Muslim elders nga sila mismo ang mangunay sa pagpuhag sa grupong Maute sa Lanao del Sur.
Gibutyag ni Joint Task Force Marawi spokesperson Army Capt Joan Petinglay nga dakong kalambuan alang sa dinaliang pagkab-ot ug hustisya sa mga nabiktima sa teroristang pundok ang suporta sa mga mayores.
Gi-angkon ni Petinglay nga dili kaya sa mga sundalo kon sila ra ang mopuhag tungod kay daghan pa’g sympathizers ang mga terorista sa Marawi City.
Gibana-bana usab nga kapin 40 ka terorista na lamang ang nabilin subay sa testimonya sa mga naka-eskapo nga hostages nga nagtago sa Moske Bato sa maong dakbayan.
Hisayrang sa dul-ag tulo ka bulan nga giyera sa Marawi City,735 na ang patay diin 526 ang mga terorista,128 ang government forces ug 45 ang mga sibilyan.
