Sama sa gilauman, walay laraw si Presidente Ferdinand Marcos Jr nga babagan ang bisan kinsang grupo nga mupasaka sa kasong impeachment batok sa iyang bise presidente nga si Sara Zimmerman Duterte – Carpio.
Sa press briefing sa Malacanang, gipalig-on ni Palace Press Officer Atty Claire Castro nga “hands off” ang presidente sa mga tawong gusto mupasaka’g kaso kang Duterte.
Iya usab gipasabot nga trabaho sa mga magbabalaod ang magtimbang sa mga reklamo ug kinahanglan manubag ang makasasala sa balaod sa Pilipinas.
Sa pagkakaron, ang tolo ka reklamo batok Duterte nagsumikad sa grupo sa mga sibilyan, relihiyoso, mga pari ug madre, ug mga abogado.
Ang reklamo naglakip sa alegasyon sa pagpanikas ug paglapas sa pagtug-an sa gigamitan sa P612 milyon nga confidential funds; mga isyu sama sa hulga sa kinabuhi ni Presidente Ferdinand Marcos Jr., ug akusasyon nga nalambigit siya sa drug money.
