Sa pinakabag-ong episode sa BBM Podcast ni Presidente Ferdinand Marcos Jr., iyang gibutyag ang dakong kabalaka ug kasuko sa lapad nga kurapsyon sa Department of Public Works and Highways (DPWH), ilabi na sa mga proyekto sa flood control.
Ang presidente miingon nga ang kurapsyon karon “garapalan” na, wala na’y kahadlok, ug sila ang mga tawo nga walay katungod sa pagbulsa sa pondo sa katawhan.
Gihimo niyang pananglitan ang iyang kaagi isip gobernador sa Ilocos Norte, ug alang kaniya, dili ingon ani ka grabe ang sistema, apan karon, ang kurapsyon murag nahimong normal ug “allowable” na sa gobyerno.
Tungod niini, gilaraw ni Marcos nga ipagawa ang executive order aron magtukod sa independent commission nga adunay gahum sa pagsusi sa mga anomalya sa DPWH, ilabi na sa mga ghost projects, overpriced nga kontrata, ug substandard nga mga dalan ug flood control systems.
Ang komisyon mahimong magrekomenda sa kaso batok sa mga opisyal ug kontraktor nga nalambigit, ug posibleng palapdan pa ang imbestigasyon sa ubang proyekto sa imprastruktura.
Giklaro usab sa Presidente nga bisan kinsa nga kaalyado nga malambigit sigurado nga dili niya santohon.
Ang presidente miingon, “Sorry na lang. Ayaw na kitang kaalyado”.
Hisayran nga pinaagi sa plataporma nga Sumbong sa Pangulo, kapin sa 12,000 na ka reklamo ang nadawat sulod sa usa ka buwan, nga nagpalig-on sa panginahanglan sa aksyon batok sa kurapsyon.
