Nanawagan ang Alliance of Concerned Teachers Northern Mindanao nga dili i-dismiss ang impeachment case batok kang Bise Presidente Sara Duterte ug kinahanglan nga madayon ang impeachment trial sa Senado.
Sa interbyu sa Bombo Radyo, miingon si Roland Cruz, convenor sa ACT Northern Mindanao nga ang ilang panawagan karon mao ang "Marcos singilin, Sarah panagutin, ug Bato arestuhin" isip bahin sa ilang pagpanawagan og accountability sa mga lider sa nasud.
Dugang ni Cruz nga kung i-dismiss lamang sa Senado ang kaso nga walay trial, posible kining magpasabot nga walay hustisya ug magpadayon lamang ang mga alegasyon nga atubang sa bise presidente.
Matud pa niya, importante nga ipakita sa mga senador ang ilang pagka-impartial ug dili magpadala sa partisanong politika.
Gipasabot usab sa ACT Northern Mindanao nga ang impeachment trial maoy hustong paagi aron klarong matubag ug masukod pinaagi sa legal nga proseso ang mga alegasyon nga giatubang ni VP Duterte.
