Walay punto kung sertipikahan isip “urgent” ang usa ka sugyot kung dili pa kompleto ang committee report gikan sa kongreso.
Kini maoy tubag ni Presidente Ferdinand Marcos Jr., human siya gipangutana kung nganong gi-una niya ang pagpangayo’g kopya sa sugyot sa emergency powers gikan sa Presidential Legislative Liaison Office o plenaryo, inay nga diretso kining sertipikahan isip “urgent bill.”
Gitug-an ni Marcos nga siya mismo ang nagmando sa lower ug upper house nga kinahanglan muagi kini sa tukmang proseso ayha pa niya sertipikahan isip “urgent” ang emergency powers nga ihatag kaniya.
Iyang gipasabot nga ang shortcut sa pagligid sa usa ka balaodnon mahitabo lamang kung naa na kini sa plenary debates.
Gipamugos usab si Marcos nga sa plenaryo, pwede na mamub-an ang tulo ka adlaw nga hulat tali sa second ug third reading.
Hisayran nga ang pagsertipikar sa presidente sa balaodnon isip “urgent”, nakalatid sa Konstitusyon, Artikulo VI, Seksyon 26(2), ug usa kini sa iyang gahum.
Kung iya kining buhaton, mas mapaspas ang pagbasa ug pagpasa sa House ug Senate sa maong bill.
Apan gipili ni Marcos nga sundon ang normal nga legislative process.
Iyang giingon nga ang tumong sa urgent certification mao ang pagpadali sa pag-apruba ug pag-implementar sa mga balaodnon nga giisip nga importante ug gikinahanglan dayon, sama sa emergency powers aron masugpo ang epekto sa kalit nga pagsaka sa presyo sa lana.
