CAGAYAN DE ORO CITY – Gihimuan sa dugang intelligence investigation sa kapolisan ang utok sa pagtanom sa drogang marijuana sa 3-mil metros kuwadrado sa Purok 4,Barangay Somiorang,Matungao,Lanao del Norte.
Kini human pakyas madakpan sa hiniusang operasyon sa kapolisan nga ubos sa Lanao del Norte Police Provincial Office ang tag-iya sa yuta nga gitamnan sa marijuana ug ang mismong mga nag-atiman niini.
Gibutyag ni Police Regional Office 10 spokesperson Police Maj Joann Navarro nga kutob na lang sa pag-ibot ang ilang tropa sa 299 ka punuan sa marijuana nga nagtimbang sa 30 kilos ug nagbalor sa 45-mil 800 pesos.
Gibinlan lang sa kapolisan gamay aron magamit nga ebedensiya apan ang nabilin gipangsunog aron dili mabaligya nga ikadaot sa utok sa mga tawong makagamit niini.
