CAGAYAN DE ORO CITY – Gitay-og sa kasong pagpamusil-patay ang kahusay’g kalinaw samtang naghulat ang katawhan sa pagsugat sa bag-ong tuig diha sa Osmeña Street ning syudad kagabii.
Kini human pusila sa wala mailhi nga responsable ang market vendor nga si Aldrin Rauring 35,minyo nga lumad taga-Madamba,Lanao del Sur ug temporaryo nagpuyo sa Sitio Pinikitan,Brgy Camaman-an sa syudad.
Miingon si COCPO spokesperson Lt Col. Evan Viñas nga ‘rido’ o dumot sa pamilya ang nag-una nga motibo sa kremin sanglit kini usab ang giangkon sa iyang kabanay dihang milusad sa imbgestigasyon ang Cogon Police Station.
Nasuta nga kamulo’g baligya sa mga lamas ang biktima kuyog sa iyang kapikas ug ilang anak dihang gipusil sa wala mailang suspek ang ulo niini gamit ang kalibre 45 nga armas.Gidali pa pagdala sa Maria Reyna -Xavier University Hospital ang biktima apan patay na kining naatiman sa mga doktor.
Gitakdang ilubong ang patay’ng lawas sa biktima sa subay sa tradisyong Islam sa Madamba karong adlawa.
