Nagpahimangno ang Iligan City Police Office sa tanang katawhan nga magpabiling mabinantayon sa ilang palibot ug dayong ireport ang bisan unsang mamatikdan nga kahimtangang makapahasol sa kahusay ug kalinaw, sama sa pagpanulis ug uban pang porma sa kriminalidad. Kini human sa ubay-ubay nga reported nga kaso sa pagpangawat ug pagpanulis sa dakbayan sa Cagayan de Oro sa miaging semana, diin ang usa sa mga nadakpan nasuta nga myembro sa Martilyo Gang ug lumolopyo sa syudad sa Iligan. Namahayag si Iligan City Police Office Spokesperson PMAJ Zandrex Panulong sa Bombo Radyo nga pasalig ang ilang buhatan nga makigkoordinar sa kapulisan sa Cagayan de Oro alang sa mas hapsay nga pagsulbad sa kaso ug sa pagdakop sa kauban sa suspetsado nga nakaikyas.
