CAGAYAN DE ORO CITY – Mahimong kuwestiyonon sa bisan kinsa nga indibidwal o partido sa politika ang kalit pagsaka sa ihap sa aplikasyon sa nagbalhin nga mga botante sa lungsod sa Villanueva,Misamis Oriental.
Kini human nabantayan sa kampo nila ni Villanueva Mayor Jenny Uy ingo man ni Vice Mayor Jeric Emano ang pagdagsa sa mga tawo nga gusto magpa-rehistro aron magsilbing dugang botante sa ilang lungsod.
Gibutyag ni Villanueva Election Officer Mariane Capin nga dunay igong higayon ang intresadong grupo aron mohimo’g ‘verified complaint’ ug mahimuan sa tukmang aksyon.
Apan giklaro usab ni Capin nga hangtod nga walay masang-at nga reklamo, dawaton nila ang mga aplikante pagka-botante ilabina kon kumpleto ang dala niini nga mga rekisitos.
Una niini, anaa sa mil- 118 ka tawo ang nalista isip transeferee voters apan wala una magsulti si Capin kon asa nagsumikad nga lungsod sa lalawigan.
Nagdumili usab sa pagkompirmar si Emano sa impormasyon nga gikan sa lungsod sa Manticao ang maong mga botante nga namalhin sa rehistro sa Villanueva.
Dumduman nga sa miaging Mayo 2022 nga piliay,midaug si Uy sa iyang ikatulo nga termino pagka-mayor batok kanhi Misamis Oriental Board Member Virgilia ‘Bibing’ Dumadag sa labaw lang nga botos nga mil-800.
