CAGAYAN DE ORO CITY – Gimatud-an sa kapolisan nga wala nila hunungi ang pagsulbad sa kamatayon sa sakop sa media nga gipusil-patay sulod sa announcer’s booth sa Calamba,Misamis Occidental.
Kini human sulod lang sa upat ka bulan nadakpan sa kapolisan ang duha sa mga responsable pagpatay sa biktima nga si Juan Jumalon alyas DJ Johnny Walker tungod sa kasong murder.
Gibutyag ni Police Maj. Joann Navarro,tigpamaba sa Police Regional Office 10 nga nadakpan ang mag-agaw nga sila Boboy Bongcawel ug Reynante Bongcawel,pulos hingkod ang mga edad ug nagpuyo sa Brgy Poblacion,Sapangdalaga,Misamis Occidental subay sa mando ni korte.
Kampante ang PRO 10 nga madutlan sa kaso ang mga dinakpan aron mahatagan sa hustisya ang pamilya sa maong magsisibya.
Si DJ Johnny Walker ang giingong gipusil-patay ni Julito Mangumpit alyas Ricky samtang kamulo nga naka-FB live program sayo sa buntag niadtong Nobyembre 5,2023.
Samtang dili na madugay ug sunod nang madakpan sa kapolisan ang nagsugo sa tulo ka lalaki nga mipusil-patay sa maong magsisibya.
Kini resulta sa pagkadakpi na sa mag-agaw nga apil sa mi-atake sa biktima nga si Jumalon sulod sa iyang balay.
Namahayag si Navarro nga napun-an pa ang ilang impormasyon gikan sa mag-agaw nga Bongcawel rason nga dili na lisod ang pagtumbok sa mastermind sa kamatayon ni Jumalon.
Hisayrang wala konsideraha sa kapolisan nga may kalabutan sa trabaho ang kamatayon sa biktima apan tungod sa bangi sa yuta nga pending pa sa korte sa ilang lugar.
