CAGAYAN DE ORO CITY-Mihinay na ug nagkatibulaag ang nabiling teroristang Maute nga mi-ukupar sa pipila ka bahin sa sentro sa Marawi City,Lanao del Sur.
Kini ang kumpiyansa nga panglantaw ni ARMM Gov Mujivv Hattaman dihang nahatagan siya sa operations orientation sa militar ug kapolisan nga mipuhag sa mga terorista sa maong dakbayan.
Si Hattaman miingon nga dili na maguday ug mahingpit nang malupig sa tropa sa gobierno ang grupo sa mga terorista kinsa mipatay na daghang mga sibilyang Kristiyano.
Gihagit usab ni Hattaman teroristang Maute ug Abu Sayyaf Group nga ihunong na ang ilang pagpanghasi diin grabeng apektado ang mga sibilyang Kristiyano ug Muslims ilabina sa Marawi City.
Kini ilabina nga gitamod na’g sugod sa mga igsoong Muslim ang ilang tinuig nga pag-obserbar sa Ramadan.
Gibutyag ni Hattaman nga nasayod ang maong grupo nga sukwahi sa pagtulun-ang Islam ang ilang gihimo hinungdan angay na nila kini nga ihunong ilabina sa kasaulugan sa Ramadan.
