CAGAYAN DE ORO CITY-Gitukod karon ang centralize prosecution office aron tutukan ang mga kaso nga hayan maduso batok sa teroristang Maute ug Abu Sayyaf sa mga korte dinhi sa syudad.
Kini sa pagsiguro nga mapadali ang pagsuta kon may angay ipasaka nga kaso o wala batok sa mga terorista nga nanghasi sa Marawi City.
Namahayag si acting Chief City Prosecutor Merlynn Uy nga may mga prosecutor gikan sa kauluhan ang moabag sa ilang pag-atiman sa mga kaso sa mga terorista.
Siya miingon nga kon ugaling adunay himoong nga inquest proceedings,ilusad kini sulod sa Camp Evangelista diin unang gimando sa korte suprema nga pahimutangan sa mga terorista.
Gibutyag ni Uy nga mga prosecutor usab nga gikan sa Metro Manila nga mopatabang aron mapadali ang pag-atiman sa mga kaso nga maduso sa ilang buhatan.
