Gipadayag ni Col. Jessie Montoya, Deputy Commander sa 103rd Infantry Haribon Brigade, nga dako ang pagkunhod sa hulga sa Dawlah Islamiyah Maute Group human sa malampusong operasyon nga misangpot sa pagkamatay sa napulo ka miyembro, lakip ang usa ka senior leader ug sub-leader sa grupo.
Matod pa niya, ang nahibiling lima ka miyembro dili na aktibo ug nagkabahin-bahin na sa gagmayng grupo, hinungdan nga mas nahuyang ang ilang organisasyon sa mga lugar sa Lanao.
Dugang pa ni Montoya, dako ang posibilidad nga mosurender na usab ang nahibiling mga miyembro aron malikayan nga masunod sa ilang mga kauban nga napatay sa operasyon.
Samtang, wala na usab suportahi sa katawhan sa Lanao ang maong grupo tungod sa kalisod ug kagubot nga ilang gidala sa komunidad, hinungdan nga naglisod na sila sa pagpangita og dangpanan.
