CAGAYAN DE ORO CITY – Nasikop sa militar ang gitoohang recruiter sa Maute-ISIS terrorist group sa Lanao del Sur.
Miingon si 103rd Infantry Brigade commander Brigadier General Romeo Brawner nga tungod kini sa ilang mas gipahugot nga kampaniya batok sa recruitment activities sa teroristang grupo.
Apan wala na nganli ni Brawner ang maong recruiter aron dili maapektuhan ang ilang operasyon batok sa mga kauban niini.
Gikumpirma usab ni Brawner ang suporta sa mga residente nunot na sa ilang pangandoy nga mabungkag ang Maute- ISIS group.
Una nang nadakpan sa militar sa Lanao del Sur ang duha ka supporter sa maong grupo.
Nasayran nga ang grupong Maute-ISIS ang utok sa pagpanghasi sa Marawi City diin natigayon ang lima ka bulan nga engkuwentro tali militar sa miaging Mayo hangtod Oktubre 2017.
