CAGAYAN DE ORO CITY – Dili pag-insulto kang Pres Bongbong Marcos apan pagtul-id lamang sa sayop nga pagpanginlabot sa Local Water Utilities Administration o LWUA ang paghimo’g mga lakang sa Mindanao Association of Water Districts o MAWD aron paluyuhan ang kahimtang sa COWD.
Kini ang pagsabot ug depensa sa naka-floating status nga COWD chairman of the board nga si Nelia Lee atol sa MAWD meeting syudad kagahapon sa hapon.
Namahayag si Lee nga klaro nga sa unod sa presidential decree 198 nga maka-takeover lamang ang LWUA kon utangan ug maglisod pagbayad ang usa ka water district ngadto kanila.
Apan gitambagan si Lee usa sa mga abogado nga anaa sa MAWD meeting nga opinyon lamang niya kini ug bugtong korte suprema ang makahatag sa ensaktong hubad sa maong lantuging legal.
Dumduman nga mismo si Marcos ang nagsugo sa LWUA nga tun-an ang giatubang nga mga suliran sa COWD ilabina kini sa tubig sa Cagayan de Oro Bulk Water Incorporated kay nagkabangi sa isyu sa bayrunon.
