CAGAYAN DE ORO CITY – Girekomendar sa chairman sa committee on trade and commerce sa konseho sa syudad nga wad-an na sa business permit ang Max4 Unlimited Company nga nakabase sa syudad.
Kini human pakyas makatambong ang mga opisyal sa maong investment scheme sa gipatawag nga pagdungog kagahapong adlawa.
Miingon si City Councilor George Goking,chairman sa komitiba nga gawas sa kanselasyon sa business permit, girekomendar usab niini sa National Bureau of Investigation NBI-10 nga kasuhan ang mga kadagkuan sa kompanya.
Gusto mabawi sa investors ang ilang minilyong puhunan apan giingong pakyas kining mabalik sa kompanya ngadto kanila.
Samtang gikompirmar sa Securities and Exchange Commission o SEC-10 nga walay secondary permit ang kompanyag Max4 Unlimited aron modawat sa investment taking gikan sa ilang ma-recruit nga mga mahimong miembro ning syudad.
Kini human kumpirmaha sa city hall nga naghatag lamang sila’g permit sa Max4 isip herbal distributor sa dakbayan.
Miingon si SEC regional administrator Jeshey Salazar nga gihulat nila ang kamanduan gikan sa kauluhan aron kasuhan sa korte ang naglangkob sa maong kompanya.
Nasuta nga pipila ra ka metros gikan sa city hall ang opisina sa Max4 apan pakyas makatambong ang mga opisyal niini sa duha ka hearings sa konseho.
Dugtong niini,gihagit sa govt officials ang tigdumala sa maong kompanya nga mohatag sa katin-awan alang sa ilang panig.
