CAGAYAN DE ORO CITY, Philippines – Maximum tolerance ug dili pag-atake ang gilusad sa Police Regional Office 11 sulod sa compound sa Kingdom of Jesus Christ (KOJC) sukad sa adlaw’ng Sabado.
Pagtin-aw kini ni PNP Chief General Rommel Francisco Marbil sa pasangil nga report sa SMNI News Channel nga “atake” ang ilang gipahigayon sa pasilidad, kung asa natumbok nga nagtagu-tago ang wanted person nga si Pastor Apollo Quiboloy.
Miingon si Marbil nga walay gipasakitan ang ilang kapulisan, apan, dili muminos 10 ka pulis ang samaran human gisumbag, gilabayan sa bato, ug naipit sa nagbarikada nga mga miyembro sa KOJC pasulod sa bunker kung asa natumbok nga atua didto si Quiboloy.
Gipamugos sa liderato sa PNP nga walay human rights violation nga gihimo ang kapulisan apan ang mga tawo sulod sa compound ang nagbaraw kanila nga himoon ang ilang trabaho, isip mando sa korte nga isilbi ang warrant of arrest ni Quiboloy.
Kini ang rason nga ilang gisikop ang dul-an 20 ka miyembro sa simbahan human sila migamit sa puwersa batok kapulisan.
