CAGAYAN DE ORO CITY – Gitahasan ni Tagoloan Mayor Atty Nadya Emano-Elipe ang kapolisan nga mapadali ang pag-irog sa imbestigasyon aron masikop na ang utok sa kamatayon sa sacristan nga 2nd year college student sa Tagoloan Community College nga si Lady Grace Galo.
Gihimo sa mayora ang mensahe nunot sa iyang personal nga pagduaw sa pamilyang nagmasub-anon samtang gihaya ang biktima sa ilang balay sa Purok 4,Sitio Dinogon,Brgy Sta Ana,Tagoloan,Misamis Oriental.
Nasubo pag-ayo si Elipe nga naputol ang pangandoy sa 19 anyos nga dalaga tungod lang sa linu-og nga binuhatan sa wala pa gihapon matumbok nga mga responsabli.
Kini ang rason nga gipaabot sa mayora ang pasubo sa pamilya ug dala ang pasalig nga dili mohunong ang kagamhanang lokal hangtod nga madakpan ang mga kreminal.
Si Lady Grace ang usa sa mga tinun-an sa TCC nga ug aktibo usab nga altar server sa Sta Ana Parish hinungdang nakurat pag-ayo ang katawhan sa gidangatan niini.
Apil sa nagpaabot sa simpatiya sila Municipal Consultant Rolando Seno, Sangguniang Bayan member Kagawad Mikka Nabong Sultan, Amahan sa Barangay Sta. Ana Kapitan Elmo Ragandang, Kagawad Enteng Emano, Hepe sa PNP Tagoloan Major Renz Marion Serrano ug 2nd District Congressional Staff Jaylord Adame sa ngalan ni Cong. Bambi Emano sa pamilya nga nagmasulub-on ning panahona.
Hisayrang gitoohang gisulaya’g lugos ang biktima apan misukol kini hinungdan nga nadunggaban ug nabun-og pag-ayo rason nga nabugtuan sa kinabuhi.
