CAGAYAN DE ORO CITY – Gisumbalika’g batikos ug gitambagan ni City Mayor Rolando ‘Klarex’ Uy ang kampo ni Cagayan de Oro 1st District Cong. Lordan Suan nga dili mag-apil apil sa isyu sa panubig sa dakbayan.
Kini ang hait nga tubag sa mayor nunot sa gisulti ni Suan nga adunay pakigtagbo usab ang iyang buhatan tali sa Cagayan de Oro Water District (COWD),Cagayan de Oro Bulk Water Incorporated (COBI) ug Local Water Utilities Administration o LWUA aron sulaya’g sulbad ang problema sa panubig sa syudad.
Miingon si Uy nga problemang lokal kini ug kontra-tiempo sa gihimo ni Suan.
Gisupak usab sa mayor ang posibilidad nga e-takeover sa LWUA ang pagdumala sa COWD nga nag-atubang sa dakong bayrunon sa Cagayan de Oro Bulk Water Incorporated o COBI.
Samtang gilayong nagpalugwa sa manifesto of support ang sobra 50 ka kapitanes kabahin sa baruganan sa city govt nga dakong supak nga manghilabot ang LWUA sa pagdumala sa panubig sa syudad.
Miingon si ABC Vice President Gusa Punong Brgy Marlo Tabac nga bisan sila ang dakong supak nga mosulod sa eksena ang ubang ahensiya kabahin sa giatubang nga suliran sa COWD.
Kini ang rason nga mipirma sila’g manifesto aron kontrahon usab ang pipila ka probisyon sa COWD-COBI contract ilabina ang kada-tulo ka tuig nga otomatikong water rate increases.
Sa pikas bahin,walay hurisdiksyon ang LWUA aron kuptan niya ang pagdumala ug operasyon sa COWD sa syudad.
Kini ang pagtin-aw ni Konsehal Atty. James Judith nunot sa hugon-hugon nga wad-an sa kontrol ang hunta direktiba ug mngt nunot sa nagkarabeng suliran sa COWD.
Miingon si Judith nga mahimo lang mo-takeover sa maong ahensiya kon ang unsa ka water district nagbaton sa dakong utang ug naglisod sa pagbayad niini.
