CAGAYAN DE ORO CITY – Bakak ang mikatag sa social media nga kritikal ang kahimtang ni City Mayor Rolando ‘Klarex’ Uy hinungdan na-admit daw sa city hospital dakbayan.
Kini ang katin-awan sa tigpamaba sa mayor nga si Janboy Actub isip paghupay sa kabalaka sa katawhan sa kahimtang sa panglawas niini.
Gikompirmar ni Actub nga nagka-trangkaso si Mayor Klarex epekto sa dili maayong lakaw sa panahon hinungdan nga nagpahulay kini sa pipila ka adlaw sa ilang pinuy-anan.
Gibulgar usab niini nga migamit sa artificial intelligence generated picture ang grupo nga nanunglo sa kahimtang sa mayor.
Gikondinar sa city govt ang utok sa pagpakatag sa fake news ug nanganti nga mohimo’g aksyon kabahin niini.
Una niini,namulong si City Information Office head Ian Fuentes nga natumbok na nila ang utok sa maong Facebook page nga responsable sa pagkayalap sa bakak nga impormasyon.
