NAGPADALA SA TABANG AYUDA ang LGU sa Cagayan de Oro ngadto sa Iligan City aron mapaspasan ang clean-up operations human sa kadaot nga gipahinabo sa Tropical Storm Basyang niadtong Huwebes, Pebrero 5.
Sumala ni Jade Adeser, Acting City Information Officer, gisugo ni City Mayor Rolando “Klarex” Uy ang mga buhatan sa City Disaster Risk Reduction and Management Department (CDRRMD), City Engineering Office, City Public Services Department (CPSD), ug City Information Office (CIO) nga mag-deploy og dugang nga manpower ug mga ekipo sama sa payloader, water tanker, ug dump truck aron ipadala sa Iligan City.
Gawas sa mga kahinguhaan sa syudad, gipadala usab sa mayor ang iyang personal nga mga ekipo, lakip ang tulo ka 10-wheeler truck, usa ka payloader, ug usa ka water tanker.
Sa kinatibuk-an, duha ka trailer, upat ka 10-wheeler truck, duha ka payloader, ug duha ka water tanker ang napadala sa Iligan City aron motabang sa paglimpyo ug pagbangon sa syudad.
Gipakita sa maong lakang ang panaghiusa ug tabang-tabang tali sa mga lokal nga pangagamhanan aron dali nga makabangon ang mga apektadong lugar human sa kalamidad. (James Oliver)
