CAGAYAN DE ORO CITY – Gihimakak ni City Mayor Rolando ‘Klarex’ Uy ang pasangil nga migasto’g dakong salapi aron ipalit sa ka brand new cars isip grand prizes sa Christmas party sa mga empleyado sa city hall ning semanaha.
Kini human unang nahingawa ang pipila ka magbubuhis nga maapektuhan ang panudlanan sa city hall gumikan sa sobra ka mahal sa mga presyo sa pa-raffle alang sa mga empleyado.
Miingon si City administrator Atty Hilario ‘Roy’ Raagas nga bisan usa ka dako,walay gasto ang city govt sa mga sakyanan kay gi-kulektaha’g tag-500 pesos kada-usa ang city hall employees alang niini.
Depensa ni Raagas nga ang Wigo, Innova ug Raize ang labing barato nga klase sa sakyanan sa kompanyang Toyota nga nagkatidad lamang sa 2.5 milyones pesos ang tanan.
Hisayrang daan na kining gipasabot ni Uy nga may kolektahon nga kontribusyon gikan sa city hall employees aron gamiton pagpalit sa maong mga sakyanan nga e-raffle mismo sa ilang Christmas party sa Disyembre 16,2022.
